البيان الأول لحركة حقي

احنا مجموعة من الطلاب في جامعة المنصورة فكرنا نتصرف بشكل إيجابي علشان ناخد حقنا لما عرفنا إن واحد زميلنا في جامعة أسيوط اكتشف بالصدفة إن القانون بيحدد الرسوم الدراسية لطلاب انتظام : 8 جنيه , ولطلاب انتساب : 14 جنيه ... يعني الرسوم الدراسية
اللي بندفعها غير قانونية , وكمان الدستور بيقول إن التعليم مجاني في كافة مراحله ... يعني أي فلوس بندفعها زيادة مخالفة للقانون والدستور.
عايزين إيه:
احنا متمسكين بالقانون والدستور ... وعاوزين ندفع الرسوم اللي حددها القانون.
عايزين التعليم يبقي علي أساس المجموع مش الفلوس.
عاوزين تعليم مجاني بجد ... يكون علي مستوي يليق بينا ... عاوزين خفض للمصاريف ... خفض لأسعار الكتب ... إتاحة المعامل ... اشتراكات الطلبة في الأتوبيسات والقطارات ... دعم ملاعب الجامعة للطلاب ... خفض حقيقي لمصاريف المدينة الجامعية ...
عاوزين نشتغل علي كل القضايا اللي تخصنا أولا كطلاب وثانيا كأفراد في المجتمع.
نعمل إيه:
أهم حاجة إننا نفهم إن ده حقنا وندافع عنه بأي طريقة ... يعني مثلا فيه طلبة رفعت قضايا في جامعة أسيوط والقاهرة وحلوان وفيه طلبة قدموا شكاوي لرؤساء الجامعات علشان خفض المصروفات.
فيه حاجات كتير ممكن تتعمل لو فكرنا بشكل جماعي نقدر بيها ناخد حقنا اللي بيحدده
الدستور والقانون.

Tel.: 019 22 96 705
Email: hakky.movement@yahoo.com
Blog: HakkyMovement.blogspot.com
On Facebook: http://tinyurl.com/3ttpxr